Vita ‘e femmena

T’hanno pigliate
pe’ ‘na bambola ‘e pezze;

‘a sera ncopp’o cumò e
‘o juorno sistemata mmiezz’o lietto.

è ‘o putere ‘e ll’uommene
ca s’annasconneno addereto

a sta parola ca chiammano dio.

uommene ‘e putere, dio e tradizione,
accussì vonno ca ‘a capa, ‘e capille e

‘a faccia toia
te le annasconnere,

comme si essere femmena
è nu peccato, ‘na colpa

comme si t’avissa mettere
scuorno d’essere ‘na femmena:

– ma chi aggio acciso? – ,
t’addumanno ‘a ruimila anni.

femmena so’ nata
e femmena aggia campà e

murì.

chisto nun è né ‘nu sfregio
né ‘na sfida a dio:

addereto a sti cancella
ce sta solo ‘a vita mia:

vita
‘e femmena.

27/09/2010

‘A seggia ‘e paglia

Si ‘na seggia ‘e paglia,
eppure,

senza scuorno,
tieni

annascunnuto
‘o core mio.

lieveme
‘sti manette:

me tieni
prigiuniere:

a libbertà mia
è pure ‘a toja.

9/05/2010

‘O mese ‘e maggio

‘O mese ‘e maggio è ‘o viaggio d’o core.
ll’anema te scarfa ‘o sango cchiù d’o sole.

e ll’addore ‘e sciore te portano nfunn’o mare,
addò ogni ricordo perduto sponta comm’o chianto
‘e nu criaturo e tene ‘a capacità ‘e te fa chiagnere:

– Maronna, ma comme po’ essere doppo tantu tiempo ? -,
ma isso è comme si dicesse: – Niente è perduto dint’o core –

‘o palummo uatto uatto, cacarianne buttuncielle ‘e mmerda,
spullechea ‘a mullechella ‘e pane e pare ca sta sempe
a dicere: – Che bellu culo ca tiene –

‘e vicchiarelle dint’e ciardine e for’e vasce parlano comme
quanno erano tutte figlulelle nammurate ‘e ll’ammore, ca
era chhiù no ca si: Vuò ascì cu mme? le diceva ‘o spasimante.
E tutta sprucita e ntussucosa le diceva: No, lievatelle a capa –

Ma nun appena chillo vutava a faccia, essa, a figlulella,
subbeto se penteva e diceva: Ma songo propria ‘na scema.
E vicchiarielle, invece, mò songo tutte cavaliere gentili.

E, guardanno ‘e rose rosse ‘e maggio, ca ‘a zingarelle
cu ll’uocchie e ‘e capille nire, le vo vennere, niente a niente,
cu ‘a vita ca pe’ campà onestamente te fa murì,

ddoje lacreme, si capisce, niente di che;
ddoje lacreme mmiscate a chello ‘e ‘nu criature e ‘e nu ‘nnamurate,
è, forse, ‘o riale cchiù overo ca può fa ‘o munno d’o core tuio.

29.12.2008

A Bazar

Bazar,
(o comme
te chiamme tu).

Bazar,
astro che brilla,
addurmuto dint’o scuro.

Nuje,
ca dint’a blogosfera
fujmmo ‘a morte.

Blazar criaturo.
Blazar guaglione.
Blazar spiga ‘e grano.

Blazar aria fresca.
Blazar ‘o fuoco dint’e vvene.
Blazar ca vola ‘nziem’e penzieri.

Blazar ottomila litri d’acqua.
Blazar ‘na vita accussì.
Blazar ca parla cu ‘na jatta.

Blazar
amico ‘e scrittura.

Statte bbuono, fa buon viaggio,
ca io, nun aggio mai ditto:
Addio.

22 Maggio 2010

‘Nzierr’a porta, chella porta sempe aperta:
e, l’he ‘n zerrate cu ‘na catena d’acciaio.

‘Nzierre ll’uocchie:
e, l’he ‘n zerrate comme ‘o suonno d’e ccriature.

‘Nzierr’o core:
e, l’he ‘n zarrate, atterrannelo.

‘Nzierre ‘o cuorpo:
e, l’he ‘nzerrate cu ‘a violenza.

– ‘O penziero mio, he ditto, è stato chillo
‘e chiudere pe’ sempe pure ll’addore

‘a puzza;
‘nzomma, ll’uòsemo, ‘o sentore
‘e ll’anema.

e, ll’anema, nun vo scurdate mai,
è ‘na carogna in putrefazione.

se l’anima fosse rosa addirosa
nun servesse a niente.

e, accussì, aggio tentato ‘e scurdà,
cunzumannemo comme ceroggeno,
ma nun ne songo capace.

ll’uosemo parte d’o naso e,
d’a pelle, istinto animale,
fino a dint’o cereviello:

ll’uosemo
è ll’anema: ‘o stipo d’a sterpegna mia

e ‘e ogni perzona:
chesta, forse, è ‘a vera ricchezza
‘e ll’umanità.

‘e ricchezze materiale
songo sulamente abbagli,
miraggi ca svacanteno ‘a verità.

Ma isso, l’essere umano,
crede, accussì, ‘e campa bbuono,

comme ‘o pataterno.